Türkmenistanda «Arkadag Serdarly bagtyýar ýaşlar ýyly» şygary bilen atlandyrylan Täze 2023-nji ýyly baýramçylyk dabaralary bilen garşy aldylar diýip, Döwlet habarlar agentligi habar berýär.

Ýurdumyzyň şäherlerinde, şäherçelerinde, obalarynda aýdymlar ýaňlandy, bagtyýar çagalar bezelen arçalaryň daşyndan gol tutuşyp aýlandylar. Täze ýyl mynasybetli ýurdumyzyň medeniýet, sungat ussatlary – meşhur estrada aýdymçylary, wäşiler, tans toparlary hem-de teatr artistleri täze aýdymlary, tansdyr sazly kompozisiýalary, dürli sahna oýunlaryny, çykyşlary taýýarlapdyrlar.

Hormatly Prezidentimiz Serdar Berdimuhamedowyň göni ýaýlymda Türkmenistanyň halkyna Täze ýyl Gutlagy bilen ýüzlenmegi baýramçylygyň iň tolgundyryjy pursatlary boldy. Döwlet Baştutanymyz tamamlanyp barýan ýylyň esasy wakalary barada durup geçdi, döwlet durmuşynyň ähli ulgamlaryna gysgaça häsiýetnama berdi hem-de Türkmenistanyň içeri we daşary syýasatynyň geçen ýyldaky netijelerine baha berdi.

Täze ýyl baýramçylygy ajaýyp feýerwerk şüweleňi bilen tamamlandy.