2023-nji ýylyň 14-nji iýunynda Russiýa Federasiýasynda XXVI Peterburg Halkara ykdysady forumy öz işine başlady. Halkara foruma türkmen wekiliýetiniň hem gatnaşýandygy habar berilýär.

Habar berlişi ýaly, türkmen wekiliýetine Türkmenistanyň maliýe we ykdysadyýet ministri S.Joraýew ýolbaşçylyk edýär.

Halkara ykdysady forumyň «Uglerodyň kadalaşdyrylyşy we Aziýa, Afrika we Ýakyn Gündogar ýurtlarynda uglerod birlikleriniň özara dolanyşyk bazarlaryny döretmek. Dünýä ykdysadyýeti global öwrülişik döwründe» atly mejlisinde ministr S.Joraýewiň hem çykyş etmegine garaşylýar. Şeýle-de, forumyň çäklerinde onuň RF-iň ykdysady ösüş ministri Maksim Reşetnikow bilen duşuşygy meýilleşdirilýär.

Ýeri gelende bellesek, eýýäm 25 ýyl bäri geçirilip gelinýän Peterburg Halkara ykdysady forumy dünýäniň iň iri işewürlik forumlarynyň biri bolup durýar. Durnukly ösüşi üpjün etmek we dünýä ykdysadyýetiniň möhüm meselelerini ara alyp maslahatlaşmak boýunça öňdebaryjy dünýä tejribesini we başarnyklaryny paýlaşmak babatda amatly meýdança hasaplanýar.