Aşgabatdaky Türkmenistanyň Çeperçilik sergiler müdirligi we şekillendiriş sungatynyň sergi merkezinde, Arhitektorlar birleşiginiň döredilmeginiň 85 ýyllygy mynasybetli, «Arkadag eýýamynyň arhitekturasy» ady bilen ýurdumyzyň binagärleriniň toparlaýyn döredijilik sergisi öz işine başlady.
Serginiň geçirilmegiň esasy maksady ýurdumyzyň
milli arhitektura mekdebiniň gazanan üstünlikleri bilen köpçüligi
tanyşdyrmakdan, şähergurluşyk işini mundan beýläk-de kämilleşdirmekden, bu ugra
gyzyklanýanlaryň başlangyçlaryny höweslendirmekden, şeýle hem iň gowy
taslamalary saýlap-seçip almakdan we olary durmuşa geçirmek boýunça teklipleri
bermekden ybaratdyr. Döredijilik gözden geçirilişine 200-den gowrak iş
hödürlenip, taslamalar ýaşaýyş jaýlarynyň arhitekturasy; jemgyýetçilik binalarynyň
arhitekturasy; şähergurluşyk; dizaýn we taryhy ýadygärlikleriň rejelenilişi ýaly
ugurlary öz içine aldy.
Bäsleşik häsiýetinde geçýän döredijilik sergisine
edara-kärhanalar, belli arhitektorlar we dizaýnerler bilen bir hatarda degişli
ugurlar boýunça bilim alýan ýaşlaryň diplom işleri boýunça tapawutlananlary-da
işjeň gatnaşýar. On günläp dowam edýän sergidäki döredijilik işlerini synlamaga
gelýänleriň yzy üzülenok. Bu ýerdäki taslamalaryň her biri häzirki zaman
arhitekturasynyň talaplaryny doly ödeýändigi, täzeçe çemeleşmelere,
köptaraplaýyn gurluşyk ülňülerine eýedigi, durmuş-ykdysady,
arhitektura-meýilleşdiriş, sanitariýa-arassaçylyk faktorlarynyň we geografik
şertleriň giň toplumyny şöhlelendirýändigi, milli ýörelgelerden ugur alýandygy
bilen tapawutlanýar. Muny binalaryň, jaýlaryň, öýleriň içki bezeglerinde, hatda
ekologiýa taýdan arassa gurşawlaryň — ekoseýilgähleriň, «ýaşyl» öýleriň,
«akylly» tehnologiýalar esasynda enjamlaşdyrylan desgalaryň taslamalarynda
milli ýörelgeleriň, nyşanlaryň, şekilleriň, nagyşlaryň giňden ulanylmagynda-da
aýdyň görmek bolýar. Olaryň käbiriniň 3D görnüşindäki wideoşekilleriniň hem
görkezilmegi taslamalar we olary ýerine ýetirmegiň usullary bilen amaly,
ykdysady taýdan giňişleýin tanyşmaga mümkinçilik berýär. Hödürlenen binagärlik
eserleriniň arasynda paýtagtymyzda we geljegiň şäheri hasaplanýan döwlet
ähmiýetli Arkadag şäheriniň gurluşygynyň ikinji tapgyrynda göz öňünde tutulýan
dürli maksatly desgalar üçin teklip edilýän taslamalaryň hem ençemesine uly
orun berilýär.
Gözden geçirilişiň barşynda eminler topary tarapyndan iň gowy diýlip ykrar edilen işler kesgitlenilip, ýeňijileri gymmat bahaly sowgatlar, diplomdyr Hormat hatlary bilen sylaglamak dabarasy boldy.