4—14-nji awgust aralygynda Belarusda geçiriljek GDA ýurtlarynyň II oýunlaryna Türkmenistanly türgenleriň hem gatnaşmagyna garaşylýar. Bu barada «Türkmenistan: Altyn asyr» elektron neşirinde habar berilýär.

Türkmenistanyň Döwlet sport komitetiniň habaryna görä, oýunlara gatnaşmak üçin Belarusa gitjek wekiliýetiň düzümine 110 adam, şol sanda boks, dzýudo, sambo, grek-rim göreşi, erkin göreş, ýeňil atletika, taý boksy, 3x3 basketbol (erkekler), karate, ýaýdan ok atmak ýaly 13 görnüş boýunça ýaryşa gatnaşjak 82 türgen girýär.

GDA ýurtlarynyň II oýunlaryna 4 müň türgen, 900 tälimçi we 800 emin bilen bilelikde 6 müňden gowrak adamyň gelmegine garaşylýar. Oýunlaryň tapawutly aýratynlygy — ýaryşlar Belarusyň 11 şäherinde, ýagny Minsk, Borisow, Brest, Witebsk, Gomel, Grodno, Žlobin, Mogilýow, Molodeçno, Orşa we Soligorskda geçiriler. Bu format ýaryşyň geografiýasyny giňeltmäge gönükdirilendir.

Oýunlar «Güýçli häsiýet — açyk oýun!» şygary astynda geçirilýär. Bu şygar ýaryşyň esasy maksadyny gysga we gysby görnüşde açyp görkezýär.