Türkmenistan BMG-niň Baş Assambleýasynyň 12-nji sentýabrda Nýu-Ýorkda açyljak 78-nji sessiýasynda Magtymguly Pyragynyň doglan gününiň 300 ýyllygyna gabatlap 2024-nji ýylda Türki dilleriň halkara hepdeligini geçirmegi, şeýle hem Türk dilleriň bütindünýä gününi döretmegi teklip eder.

Bu barada Türkmenistanyň Daşary işler ministrliginiň resmi web sahypasynda çap edilen BMG-niň Baş Assambleýasynyň 78-nji sessiýasynda Türkmenistanyň ileri tutýan wezipelerinde beýan edilýär diýip, «Türkmenistan: Altyn asyr» web sahypasy habar berýär.

«Medeniýetara dialogy ösdürmek we BMG-niň Baş Assambleýasynyň halkara gatnaşyklarda köp dilliligi goldamak baradaky kararlaryny durmuşa geçirmek maksady bilen, Magtymgulynyň doglan gününiň 300 ýyllygyna gabatlap, 2024-nji ýylda ÝUNESKO we TÜRKSOÝ bilen bilelikde Türki dilleriň halkara hepdeligi geçirmek, mundan başga-da, şeýle kararnamalary kabul etmegiň toplanan tejribesine esaslanyp, BMG-niň Baş Assambleýasynyň «Türki dilleriň bütindünýä güni» Kararnamasyny kabul etmek mümkinçiligine garamak teklip edilýär» diýlip, resminamada aýdylýar.