Ýakynda Türkmenistanyň Ylymlar akademiýasynyň Tehnologiýalar merkezinde «Ýurdumyzda sanly ulgam arkaly enjamlary uzak aralykdan dolandyrmagyň mümkinçilikleri» atly ylmy seminar-maslahaty geçirildi. Bu barada «Türkmenistan: Altyn asyr» elektron neşiri habar berýär.
Maslahata Tehnologiýalar merkeziniň birnäçe
barlaghanalarynyň işgärleri, Himiýa institutynyň, Seýsmologiýa we atmosfera
fizikasy institutynyň, Taryh we arheologiýa institutynyň, Magtymguly adyndaky
Dil, edebiýat we milli golýazmalar institutynyň alymlary gatnaşdylar we sanly
dolandyryşyň dürli ugurlaryny ara alyp maslahatlaşdylar.
Türkmenistanyň Ylymlar akademiýasynyň Sanly ulgamlar we
maglumat howpsuzlygy bölüminiň başlygy Nurmyrat Gurbanlyýewiň çykyşynda
enjamlary uzakdan dolandyrmagyň mümkinçilikleri barada aýdyldy. Tehnologiýalar
merkeziniň Maglumat howpsuzlygy we aragatnaşyk tehnologiýalary barlaghanasynyň
esasy hünärmeni Parahat Ataýew enjamlary uzakdan dolandyrmagyň aýratynlyklary
barada gürrüň berdi.
Şeýle hem maslahatda dürli ulgamlarda anyk wezipeleri
çözmek maksady bilen sanly tehnologiýalary ulanmak we alnan maglumatlary
işlemek meseleleri barada «Türkmenistanda awtomatiki seýsmiki gözegçilik
ulgamynyň döredilmegi», «Topragyň agrohimiki düzümi boýunça sanly tematiki
kartalary işläp taýýarlamak», «Nebit we gaz pudagynda IT tehnologiýalary»,
«Elektrik hereketlendiriş dolandyryş ulgamlarynda sanly maglumatlary geçirmegiň
netijeliligi», «Himiýa institutynyň gözleg işlerinde sanly tehnologiýalary
ulanmak arkaly gazanylan üstünlikler», «Magtymguly Pyragynyň portalynyň
maglumat bazasy», «Dürli dillerde çeşmeleri ulanmakda häzirki zaman internet
mümkinçilikleri» ýaly temalardan çykyş edildi.
Çeşme: «Türkmenistan:
Altyn asyr»