18-nji awgustda Türkmenistanyň Magtymguly adyndaky milli
sazly drama teatrynda “Arkadagly döwrüň bardyr, Pyragy!” atly dabaraly maslahat
geçirildi. Ol türkmen halkynyň Milli Lideri, Türkmenistanyň Halk Maslahatynyň
Başlygy Gahryman Arkadagymyz Gurbanguly Berdimuhamedowyň täze döreden
“Pähim-paýhas ummany Magtymguly Pyragy” atly ajaýyp goşgusyna bagyşlandy. Bu
barada Türkmenistanyň Halkara habarlar merkezi habar berýär.
Gahryman Arkadagymyzyň täze goşgusynyň tanyşdyrylyşyna
bagyşlanan dabaraly maslahat çeper döredijiligiň ussatlaryny, artistleri täze
döredijilik ylhamyna ruhlandyryjy güýje öwrüldi.
Dabaraly maslahatyň başynda Magtymguly adyndaky milli sazly
drama teatrynyň artistleriniň ýerine ýetiren “Berkarar döwlet islärin” atly
edebi-çeper kompozisiýasynda beýik Magtymguly Pyragynyň Garaşsyz döwlet,
erkinlik hakyndaky arzuw-islegleriniň häzirki ajaýyp döwrümizde Gahryman
Arkadagymyzyň beýik işlerinde hasyl bolandygy, bu işleriň Berkarar döwletiň
täze eýýamynyň Galkynyşy döwründe Arkadagly Serdarymyz tarapyndan mynasyp dowam
etdirilýändigi çeper keşpde açylyp görkezildi.
Gahryman Arkadagymyzyň Gündogaryň beýik akyldary we nusgawy
şahyry Magtymguly Pyragynyň doglan gününiň 300 ýyllygyna bagyşlap ýazan bu
ajaýyp goşgusynyň merkezi gazetlerde hem çap edilendigi bellenildi. Beýik
Pyragynyň 300 ýyllygy barada söhbet açylanda, 2024-nji ýylda dabaralandyryljak
bu şanly senäniň ähmiýetine üns çekildi.
Bellenilişi ýaly, Gahryman Arkadagymyzyň ýazan bu täze
goşgusy many çuňlugyna eýe bolmak bilen, onuň bentlerinde beýan edilýän
mazmunyň yzygiderliligi, setirleriniň bogun we kapyýa sazlaşygynyň doly berjaý
edilmegi milli Liderimiziň ussat şahrylygyny nobatdaky gezek aýdyň ýüze
çykarýar. Şeýle bolansoň türkmen halkynyň Milli Lideri, Halk Maslahatynyň
Başlygy Gahryman Arkadagymyz Gurbanguly Berdimuhamedowyň täze goşgusy-da hemme
ozalky ajaýyp şygyrlary ýaly, akgynly we joşgunly okalýar, şoňa görä-de bu täze
eser halk köpçüligi tarapyndan uly höwes we kanagatlanma hem-de hoşallyk duýgulary
bilen kabul edilýär diýip, dabaraly maslahata gatnaşyjylar buýsanç bilen
aýtdylar.
Çykyşlaryň dowamynda Gahryman Arkadagymyzyň täze
goşgusyndan setirler hem okalyp, olar mysal hökmünde getirilip, Köpetdagyň
eteginde howalanyp ör-boýuna galan Beýik Pyragynyň “Berkarar döwlet istärin”
diýip, arzuwlan döwletiniň – Garaşsyz hem Bitarap Türkmenistan döwletiniň ýeten
derejelerini, halkynyň eşretli ýaşaýşyny belentden, uly buýsanç bilen synlap
duran akyldar şahyryň ruhunyň hyýallara dolýandygy bellenildi.
Maslahatyň dowamynda ýerine ýetirilen aýdym-sazly çykyşlar,
çeper okaýyşlar, çäräniň dabaralylygyny artdyryp, oňa baýramçylyk öwüşginlerini
çaýdy. Ýurdumyzyň belli estrada aýdymçylary Magtymgulynyň sözlerine döredilen
aýdymlary ýerine ýetirdiler, şahyrlar Beýik Pyragynyň şygyrlaryndan okap
berdiler, edebiýatçy alymlar akyldar şahyryň käbir goşgy setirleriniň aňladýan
manylary barada gyzykly gürrüň berdiler.
Dabaraly maslahatyň dowamynda Gahryman Arkadagymyzyň 17-nji
awgustda paýtagtymyz boýunça iş saparyny amala aşyryp, Aşgabadyň günorta
künjeginde ýerleşýän Magtymguly Pyragy medeni-seýilgäh toplumynyň çäklerinde
alnyp barylýan işler hem-de paýtagtymyzy ösdürmegiň möhüm ugurlaryna degişli
şekil taslamalar bilen tanşandygy barada hem durlup geçildi.
Maslahatyň ahyrynda oňa gatnaşyjylar “Pähim-paýhas ummany
Magtymguly Pyragy” atly şeýle kämil eseri döredip, halkymyza ajaýyp sowgat
edendigi üçin Gahryman Arkadagymyza ýene-de bir gezek tüýs ýürekden hoşallyk
bildirip, döredijilginde mundan beýläk-de täze ylham, täze eserleri arzuw
etdiler.
Çeşme: Türkmenistanyň Halkara habarlar merkezi