Arkadag şäheriniň orta hünär okuw mekdepleriniň üçüsi
2023-2024-nji okuw ýyly üçin talyplary býujet esasynda okuwa kabul edýär. Bu
barada «Türkmenistan: Altyn asyr» web saýty habar berýär.
Saçly Dursunowa adyndaky Arkadag şäher lukmançylyk orta
hünär okuw mekdebinde şepagatçylyk işi, laboratoriýa anyklaýyş işi, bejeriş
işi, fizioterapiýa we dikeldiş işi, akuşerçilik işi, ortopedik stomatologiýasy
hünärleri boýunça bilim berilýär.
Berdimuhamet Annaýew adyndaky Arkadag şäher mugallymçylyk
orta hünär okuw mekdebinde başlangyç synplarda okatmak we mekdebe çenli bilim
we terbiýe ugurlary boýunça hünärmenler taýýarlanar.
Sahy Jepbarow adyndaky Arkadag şäher ýörite sungat
mekdebine 13 hünär boýunça talyplar kabul edilýär. Bu sungat mekdebinde
talyplar sazyň taryhy we nazaryýeti, bagşyçylyk sungaty, saz mugallymçylygy,
horeografiýa sungaty we dizaýn ugurlary boýunça talyplara bilim berler.
Türkmenistanyň hünär bilim ulgamy ýurduň ykdysadyýeti we
durmuş ulgamynyň ähli pudaklary üçin hünärmenleri taýýarlaýar. Olaryň hataryna
býujet we tölegli esasynda zerur bolan hünärmenleri taýýarlamagy amala aşyrýan
dürli görnüşli orta hünär okuw mekdepleri girýär.
Bulardan başga-da, dalaşgärler «Türkmengaz» döwlet
konserniniň Mary nebitgaz orta hünär okuw mekdebinde, «Türkmennebit» döwlet
konserniniň Balkanabat nebitçilik orta hünär okuw mekdebinde, S.A.Nyýazow
adyndaky Türkmen oba hojalyk uniwersitetiniň Baýramaly agrosenagat orta hünär
okuw mekdebinde, Türkmenistanyň Söwda we daşary ykdysady aragatnaşyklar
ministrliginiň Söwda-kooperatiw mekdebinde, Türkmenistanyň Gurluşyk we
binagärlik ministrliginiň Aşgabat gurluşyk orta hünär okuw mekdebinde,
Türkmenistanyň Ministrler Kabinetiniň ýanyndaky Ulag we kommunikasiýalar
agentliginiň «Türkmendeňizderýaýollary» agentliginiň Türkmenbaşy şäherindäki
deňizçilik orta hünär okuw mekdebinde okamak üçin resminamalaryny tabşyryp
bilerler.
Ýaşy 35-den uly bolmadyk, umumy orta bilimi bolan
Türkmenistanyň raýatlary giriş synaglarynyň netijelerine laýyklykda bäsdeşlik
esasynda orta hünär okuw mekdeplerine kabul edilýär. Okuwlaryň möhleti 2-2,5 ýyl.
Tölegli esasda bilim berýän Türkmenistanyň ýörite orta
hünär okuw mekdeplerinde resminamalary kabul ediş toparlary dalaşgärleriň
resminamalaryny 2023-nji ýylyň 21-nji awgustyna çenli kabul etmegini dowam
etdirýärler.
Çeşme: «Türkmenistan:
Altyn asyr»