4-nji awgustda Aşgabat şäheriniň häkimliginiň «Mekan»
köşgünde dabaraly maslahat geçirildi. Maslahata Türkmenistanyň jemgyýetçilik
guramalarynyň ýolbaşçylarydyr agzalary, ýurdumyzyň dürli pudaklarynda zähmet
çekýän we dürli ugurlar boýunça bilim alýan ýaşlaryň 800-den gowragy gatnaşdy.
Maslahatlar zalynyň girelgesinde ýaşlaryň ylym we
tehnologiýalar babatda ýeten sepgitlerini beýan edýän sergi guralypdyr. Bu
ýerde bagşylar türkmen halk aýdymlaryny ýerine ýetirdiler.
Maslahatyň esasy maksady ýaşlaryň ylymly-bilimli bolup
ýetişmekleri üçin döwlet tarapyndan döredilýän mümkinçilik giňden wagyz etmek
bolup durýar. Mälim bolşy ýaly, türkmen halkynyň Milli Lideri, Türkmenistanyň
Halk Maslahatynyň Başlygy Gurbanguly Berdimuhamedow Arkadag şäheriniň Ruhyýet
köşgünde ýurdumyzyň taryhy, ýaş nesliň borçlary barada umumy sapak geçdi.
2023-nji ýylyň 1-nji sentýabrynda, Halk Maslahatynyň Başlygy Gurbanguly
Berdimuhamedow pederlerimiziň watansöýüjilik ruhuny, ynsanperwerlige ýugrulan
durmuş ýörelgelerini, zähmet däplerini, asylly milli häsiýetlerini mynasyp
dowam etdirýän ýaşlar Garaşsyz, baky Bitarap döwletimiziň geljegidir – diýip
nygtady.
Bilimler we talyp ýaşlar gününde hormatly
Prezidentimiziň gatnaşmagynda Aba Annaýew adyndaky Halkara atçylyk
akademiýasynyň, Berdimuhamet Annaýew adyndaky mugallymçylyk orta hünär okuw
mekdebiniň, Saçly Dursunowa adyndaky lukmançylyk orta hünär okuw mekdebiniň
açylyş dabaralary boldy. Munuň bilen bir hatarda, Aşgabat şäherinde Türkmen
döwlet binagärlik-gurluşyk institutynyň binalar toplumynyň düýbüni tutmak
dabarasyny boldy.
Türkmenabat şäherinde 5 müň orunlyk Seýitnazar Seýdi
adyndaky Türkmen döwlet mugallymçylyk institutynyň täze binalar toplumlarynyň
düýbüni tutmak dabara geçirildi. Şeýle hem, Mary şäherinde Türkmenistanyň
Döwlet energetika institutynyň çäginde 2 müň orunlyk goşmaça okuw binasynyň
düýbi tutuldy.
Maslahatda çykyş edenler, döwrebap ylym-bilim
merkezleriniň we ýokary okuw jaýlarynyň maddy-tehniki binýadyny berkitmek, bu
pudakdaky özgertmeleriň möhüm ugrudygyny bellediler.
Dabaraly maslahat Türkmen döwlet medeniýet institutynyň
«Bagtyýarlyk mukamy» aýdym-saz topary ýerine ýetirmeginde «Bilimli nesilleň
kuwwaty Watan» atly aýdym bilen tamamlandy.
Çeşme: Türkmenistanyň Halkara
habarlar merkezi