25-nji
sentýabrda hormatly Prezidentimiz Serdar Berdimuhamedowyň tabşyrygy boýunça
Döwlet migrasiýa gullugynda Türkmenistanyň raýatlygyna kabul edilen adamlara
pasportlary gowşurmak dabarasy boldy.
Ählihalk baýramyna — Watanymyzyň mukaddes Garaşsyzlyk
gününe gabatlanan bu şanly waka ýurdumyzyň ýokary ynsanperwer däplere we
adamkärçilik ýörelgelerine üýtgewsiz ygrarlydygynyň nobatdaky aýdyň beýany
boldy.
Hormatly Prezidentimiz Serdar Berdimuhamedowyň
Türkmenistanyň Halk Maslahatynyň mejlisinde eden maksatnamalaýyn çykyşynda
nygtaýşy ýaly, Garaşsyzlygynyň 32 ýyllyk baýramyny giňden belleýän Bitarap
Türkmenistan ösüşleriň aýdyň ýoly bilen ynamly öňe barýar. Berkarar
döwletimiziň ähli mümkinçilikleri öňde goýlan belent maksatlara ýetmegiň,
ýurdumyzyň her bir raýatynyň, tutuş halkymyzyň bagtyýar we eşretli durmuşyny
üpjün etmegiň anyk ugurlaryna gönükdirilýär.
22-nji sentýabrda geçirilen Ministrler Kabinetiniň
giňişleýin mejlisinde döwlet Baştutanymyzyň gol çeken Permanyna laýyklykda,
ýurdumyzyň çäklerinde hemişelik ýaşaýan hem-de 32 milletiň wekili bolup durýan
1 müň 301 adam Türkmenistanyň raýatlygyna kabul edildi. Mundan başga-da,
hormatly Prezidentimiz Serdar Berdimuhamedowyň Kararyna laýyklykda, 13 döwletiň
raýatlary we 25 milletiň wekilleri bolup durýan adamlaryň 265-sine
Türkmenistanda ýaşamak üçin ygtyýarnamalar berildi.
Pasportlary gowşurmak dabarasynyň barşynda
Türkmenistanyň raýatlygyna kabul edilen adamlar hormatly Prezidentimize
raýatlygy bolmadyk adamlaryň meselelerini çözmäge, olaryň abadan durmuşy üçin
ähli şertleri döretmäge berýän ägirt uly ünsi üçin hoşallyk sözlerini aýtdylar.
Ýurdumyzyň migrasiýa ulgamynda, şol sanda raýatlygy bolmadyk adamlary hem-de
migrantlary durmuş taýdan goramak we olara deň mümkinçilikleri bermek
meselelerini çözmekde halkara borçnamalaryny ýerine ýetirmek babatda netijeli
işleri alyp barýandygy nygtaldy. 2012-nji ýylyň martynda “Migrasiýa hakynda”
Türkmenistanyň Kanuny kabul edilip, ol döwlet durmuşynda bolup geçýän
özgertmeleri hasaba almak bilen, yzygiderli goşmaçalar girizilip,
kämilleşdirilýär.
Bellenilişi ýaly, ynsanperwer ugur ýurdumyzyň döwlet
syýasatynyň möhüm ugurlarynyň biri bolup durýar. Türkmenistanyň
Konstitusiýasyna laýyklykda, adam jemgyýetiň we döwletiň iň ýokary
gymmatlygydyr. Şunuň bilen baglylykda, milli kanunçylygymyz we halkara kadalar
esasynda ýurdumyzda ýaşaýan ähli adamlaryň hukuklaryny, azatlyklaryny,
bähbitlerini goramak we kepillendirmek üçin uly işler durmuşa geçirilýär. Şunda
BMG hem-de beýleki halkara guramalar bilen bilelikde bosgunlaryň we raýatlygy
bolmadyk adamlaryň hukuklaryny üpjün etmek boýunça Türkmenistanyň Hökümeti
tarapyndan degişli çäreleriň durmuşa geçirilýändigi nygtaldy.
Şeýlelikde, ençeme ýyllaryň dowamynda Türkmenistanyň
Prezidentiniň Permanlary bilen, ýurdumyzda ýaşaýan we şol bir wagtyň özünde hiç
bir döwletiň raýaty bolmadyk 29 müň 697 adam Türkmenistanyň raýatlygyna kabul
edildi. Häzirki wagta çenli 4 müň 753 daşary ýurt raýatyna we raýatlygy
bolmadyk adamlara Türkmenistanda ýaşamak üçin ygtyýarnama berildi.
Türkmenistan Halkara Migrasiýa Guramasynyň hemişelik
agzasy hökmünde bu ugurda taslamalary we maksatnamalary durmuşa geçirip, dünýä
jemgyýetçiliginiň tagallalaryna uly goşant goşýar. Ýurdumyz BMG-niň esasy
halkara hukuk resminamalaryna, şol sanda Bosgunlaryň statusy hakynda,
Apatridleriň statusy hakynda, Raýatsyzlygy azaltmak hakynda Konwensiýalara
goşulmak bilen, öz üstüne alan borçnamalaryna ygrarlydygyny iş ýüzünde
tassyklap gelýär.
Şeýlelikde, şu günki waka ýurdumyzyň halkara hukugyň
umumy kabul edilen kadalaryna, hormatly Prezidentimiz Serdar Berdimuhamedowyň
öňe sürýän sebit we dünýä derejesindäki ynsanperwer başlangyçlaryny ilerletmäge
üýtgewsiz ygrarlydygyny ýene bir gezek tassyklady.
Çeşme: Türkmenistanyň
Döwlet habarlar agentligi