Türkmenistanyň Magtymguly adyndaky Ýaşlar guramasynyň
Merkezi Geňeşiniň ýanyndaky «Arkadagly Ýaşlar» atly elektron žurnalynyň täze
sany okyjylara ýetirildi.
Neşiriň täze sanynyň ilkinji sahypalarynda
Türkmenistanyň halk ýazyjysy Atamyrat Atabaýewiň mundan 32 ýyl ozal ýazan
«Garaşsyz» atly meşhur şygrynyň ýerleşdirilmegi onuň täsirliligini artdyrypdyr.
Hormatly Prezidentimiziň Serdar Berdimuhamedowyň
Täjigistan Respublikasyna amala aşyran iş saparyna Türkmenistanyň Magtymguly
adyndaky Ýaşlar guramasynyň wekilleri hem gatnaşdylar. Guramanyň ýolbaşçysynyň
bu saparyň jemleri barada ýazan makalasynda Merkezi Aziýa döwletleriniň
ýaşlarynyň arasyndaky hyzmatdaşlygyň geljegine ýokary baha berilýär.
«Ýaşlara ynam ― geljege ynam» atly makala 1-nji
sentýabrda bilim we terbiýeçilik edaralarynyň açylyş we düýbüniň tutulyş
dabaralaryna bagyşlanýar.
Sentýabr aýyndaky taryhy wakalar «Altyn güýzüň altyn
sahypalary» atly sahypada öz beýanyny tapdy. «Watan hakda söz açsaň...» atly
makala halkymyzyň watançylyk mekdebiniň gadymy taryhy köklerine bagyşlanypdyr.
Neşiriň täze sanynda rus dilinde paýlaşylan ilkinji
makala Türkmenistan ― ÝUNESKO hyzmatdaşlygyna bagyşlanypdyr. «Magtymguly Pyragy:
milli terbiýe we ýaşlar» atly makala bolsa akyldar şahyryň doglan gününiň 300
ýyllygyna mynasyp seslenme bolupdyr.
Sentýabr aýynda üstünlikli geçirilen «Ýol hereketiniň
howpsuzlygy ― ömrümiziň rahatlygy» atly biraýlyga bagyşlanyp, neşiriň täze sanynda
«Ýollar asuda ― iller abadan» atly makala ýerleşdirilipdir.
«Ylym mekdepden başlanýar» atly makalada bolsa ylmy
işler boýunça ýaşlaryň arasynda geçirilen bäsleşikde ýeňiji bolan mekdep
okuwçylarynyň ylmy gözlegleri barada gürrüň berilýär.
Žurnalyň şu sanynda dünýäniň iň ýaş millionleri barada
hem gyzykly maglumatlary okap bilersiňiz. Magtymguly Pyraga bagyşlanan iňlis
dilindäki goşgy we Türkmenistanyň Garaşsyzlygynyň 32 ýyllygy mynasybetli
geçirilen dabaraly ýörişden taýýarlanylan fotokollaž žurnalyň täze sanynyň
mynasyp jemlemesine öwrülipdir.
Çeşme: Türkmenistanyň
Döwlet habarlar agentligi