13-nji ýanwarda Türkmenistanyň Prezidenti Gurbanguly Berdimuhamedow Balkan welaýatyna bolan iş saparynyň dowamynda welaýatyň Esenguly etrabynyň Gögerendag obasynyň ýaşaýjysy, balykçy Nurmämmet Meretgylyjow bilen duşuşykdy.

Döwlet Baştutany balykçy N.Meretgylyjow bilen mähirli salamlaşyp, balykçylyk hünäriniň aýratynlyklary, balykçylaryň iş we durmuş şertleri bilen gyzyklandy. Balykçy Meretgylyjow Prezident Gurbanguly Berdimuhamedowa bu ýerde awlanýan balyklar, olaryň görnüşlerini görkezdi. Olaryň hatarynda balyklaryň kakadylan görnüşleriniň hem bardygyny bellemeli. Munuň özi Hazaryň kenarynda ýaşaýan ilatyň esasy hünäri bolan balykçylygyň has-da kämilleşendigini, onuň häzirki döwrüň ýagdaýyna görä, ösüşiň ýokary derjesine çykandygyny, şeýle hem bu ugurda gaýtadan işleýän senagatyň ösdürilmegine möhüm ähmiýet berilýändigini görkezýär.

Balykçy bu ýerde balyklaryň dürli görnüşleriniň bardygyny belläp, balyk tutmakda oňyn tejribe toplandygyny we özüniň asylly käri bilen bolelin durmuşda ýaşaýandygyny gürrüň berdi. Balykçy Meretgylyjow häzirki döwürde ähli hünärlerde işleýänler bilen bir hatarda balykçylyk bilen meşgullanýanlar üçinem amatly şertleriň döredilendigini, balykçylara döwlet tarapyndan zerur goldawyň berilýändigini buýsanç bilen belledi. Şunuň bilen baglylykda balykçy özüniň 10 ýyldan bäri balykçylyk bilen meşgullanýandygyny, bu hünäriň özüne kakasyndan geçendigini we balyk awlamak hünäriniň ele alandygyna örän şatdygyny, şeýle-de hem döwlet tarapyndan balykçylykda hususyýetçilige, telekeçilige geçilendigini belläp geçdi.

Prezident Gurbanguly Berdimuhamedow balykçy N.Meretgylyjow bilen gürrüňdeş bolup duran wagty balykçynyň Meretgylyjowyň balykçy ýoldaşlary deňizden gaýdyp geldiler. Balykçynyň belleýşi ýaly, olar aýyň dowamynda 10-12 gezek deňiz giňişligine gidýändiklerini we kenardan 3 müň metr uzaklykda balyk awlaýandyklaryny, tor guranlaryndan soň howa ýagdaýyna görä ony barlap durýandyklaryny gürrüň berdi. Bellenilişi ýaly her gezek 40-50 kilogram töweregi balyk tutulýar. Bu bolsa toparyň agzalarynyň maşgalalary üçinem, söwda bazarlaryna ýerlemek üçinem ýeterlik bolýar.

Soňra döwlet Baştutany balykçynyň taýýarlaýan naharyny synlap, onuň aýratynlyklaryny taýýarlamagyň usullaryny, şeýle hem balykdan taýýarlanan tagamlaryň ýokumlyk derejesi bilenem içgin gyzyklandy. Meretgylyjow balykdan taýýarlanýan tagamlaryň görnüşleriniň örän köpdügini, olaryň toý-baýramlaryň bezegine öwrülýändigini aýtdy.

Türkmen Lideri balykçy Meretgylyjow bilen balykdan taýýarlanýan tagamlar bilen tanyşlykdan soňra, onuň balykçy ýoldaşlary bilen duşuşyp, olar bilen gürrüňdeş boldy. Balykçylar gürrüňdeşligiň barşynda Gurbanguly Berdimuhamedowa Türkmenistanyň Prezidenti wezipesine girişip, ilkinji iş saparyny Esenguly etrabyna amala aşyrandygyny buýsanç bilen belläp, öz ýürek joşgunlaryny bu sebite mahsus bolan gazal bilen beýan etdiler.

Döwlet Baştutany balykçylara işlerinde üstünlikleri arzuw edip, deňiz kenarynyň gözelliklerini synlap, Balkan welaýatyna bolan iş saparyny tamamlap Türkmenbaşynyň Halkara howa menziline baryp, ol ýerden Aşgabada tarap ugrady.