Ženewada Türkmenistanyň saglygy goraýyş we derman
senagaty ministri A.Germanowyň ýolbaşçylygyndaky wekiliýet Birleşen Milletler
Guramasynyň Ýewropa ykdysady komissiýasynyň (UNECE) hem-de BMG-niň Ilat
gaznasynyň (UNFPA) guramagynda geçirilen “Ilat we ösüş: hukuklaryň we saýlawyň
üpjün edilmegi” atly sebit maslahatynyň işine gatnaşdy. Bu barada
Türkmenistanyň DIM-niň metbugat gullugy habar berýär.
Maslahatyň dowamynda BMG-niň Ýewropa
ykdysady komissiýasy tarapyndan bäş ýyllyk döwürleýin syn gatnaşyjylaryň
dykgatyna ýetirildi, şeýle hem çäräniň mowzugy bilen baglylykda, ozal
taýýarlanan döwürleýin hasabatlaryň esasynda ýurtlar tarapyndan bu ugurdan
durmuşa geçirilýän strategiýalar we düzülen maksatnamalar, ýetilen
sepgitler ara alnyp maslahatlaşyldy.
Türkmenistanyň wekiliýetiniň ýolbaşçysynyň
çykyşynda ýurdumyzda ilat we saglygy goraýyş pudagynda yzygiderli durmuşa
geçirilýän döwlet maksatnamalar, enäniň we çaganyň saglygyny goramak
ugrunda, şol sanda, ýokary hilli derman serişdelerini we enjamlaryny satyn
almak arkaly reproduktiw saglygy ugrunda hödürlenýän hyzmatlaryň hilini
ýokarlandyrmakda gazanylan üstünlikler barada, şeýle hem döwlet
meýilnamalaşdyryş işlerinde uly ähmiýete eýe bolan 2022-nji ýylda geçirilen
ilat we ýaşaýyş jaý gorunyň uçdantutma ýazuwy barada bellenilip
geçildi.
20-nji oktýabrda saparyň çäklerinde türkmen
wekiliýetiniň BMG-niň Ilat gaznasynyň Ýerine ýetiriji direktorynyň orunbasary
Diena Keýt bilen duşuşygy geçirildi, onuň dowamynda ikitaraplaýyn
hyzmatdaşlygyň häzirki ýagdaýy bilen bagly meseleler ara alnyp maslahatlaşyldy
we ýakyn geljek üçin ileri tutulýan ugurlar kesgitlenildi.
Çeşme: Türkmenistanyň Daşary işler
ministrliginiň resmi saýty