15-nji maýda Merkezi Aziýa ýurtlarynyň (Gazagystan, Gyrgyzystan, Täjigistan, Türkmenistan we Özbegistan) Milli Söwdany ýeňilleşdirmek komitetleriniň 11-nji sebitleýin ýygnagy Almaty şäherinde “Merkezi Aziýada söwda işiniň ýeňilleşdirilmegi» taslamasynyň goldawy bilen geçirildi. Germaniýanyň Ykdysady Hyzmatdaşlyk we Ösüş Ministrliginiň (BMZ) adyndan Halkara Hyzmatdaşlyk boýunça german jemgyýeti (GIZ) tarapyndan guraldy.

Bu çärä Türkmenistandan Söwda we Daşary ykdysady gatnaşyklar ministrliginiň, Maliýe we ykdysadyýet ministrliginiň, Ministrler kabinetiniň ýanyndaky Ulag we aragatnaşyk gullugynyň, Döwlet Gümrük gullugynyň, şeýle hem “Türkmen Logistika” Assosiasiýasynyň agzalary gatnaşdy.

Duşuşykda, "E-Phyto" , "CART.IS" ýaly sanly başlangyçlary goşmak bilen söwdany ýeňilleşdirmek pudagynda innowasion çözgütleri we söwda proseslerini döwrebaplaşdyrmaga we çaltlaşdyrmaga gönükdirilen beýleki sanly çözgütleri ara alyp maslahatlaşyldy.

Gatnaşyjylar şeýle hem Merkezi Aziýada söwda amallaryny ýönekeýleşdirmek boýunça iş meýilnamasyny ara alyp maslahatlaşdylar.

Duşuşygyň netijesinde Milli Söwda ýeňilleşdiriş komitetleri Merkezi Aziýa üçin sebit başlangyçlaryny we “Ýol kartalaryny” hödürlemekden, sebitdäki söwda amallaryny gowulandyrmak üçin bilelikdäki hereket meýilnamasyny düzdi.