Ýakynda Türkmenistanyň maliýe we ykdysadyýet ministri bilen Beýik Britaniýanyň Hökümetiniň Işewürlik we söwda edarasynyň Gündogar Ýewropa we Merkezi Aziýa boýunça eksport direktory hanym Sara Elizabet Çijiniň arasynda duşuşyk geçirildi.

Duşuşykda söwda we maýa goýum ugurlarynda ikitaraplaýyn hyzmatdaşlygy ösdürmegiň mümkinçilikleri ara alnyp maslahatlaşyldy. Onda bu duşuşygyň Türkmenistan bilen Beýik Britaniýanyň we Demirgazyk Irlandiýanyň Birleşen Patyşalygynyň arasyndaky gatnaşyklaryň häzirki ösüşine baha bermäge şert döredýändigi, Türkmen-britan söwda-senagat geňeşiniň çäginde maliýe pudagyndaky hyzmatdaşlygyň utgaşdyrylýandygy nygtaldy.

Myhman britan tarapynyň söwda, bilim we beýleki ugurlarda hyzmatdaşlygy giňeltmäge taýýardygyny aýdyp, bilelikdäki söwda-senagat geňeşiniň mejlisini geçirmek boýunça gyzyklanmalaryny beýan etdi. Saparyň dowamynda Türkmenistanyň Daşary işler, Bilim ministrlikleri, aýry-aýry edaralaryň wekilleri bilen duşuşyklaryň geçirilendigi, olarda ýurdumyzda britan ýokary okuw mekdepleriniň şahamçalarynyň açylmagy, «ýaşyl» energiýa boýunça hyzmatdaşlyk meseleleriniň ara alnyp maslahatlaşylandygy mälim edildi. Britan kompaniýalarynyň oba we suw hojalyk tehnikalaryny üpjün etmäge, Garagum derýasyny döwrebaplaşdyrmaga gyzyklanma bildirýändigi hem aýdyldy.

Ministr ikitaraplaýyn gatnaşyklaryň işjeň ösdürilýändigini, şunda söwda we ykdysady babatda esasy ugurlaryny kesgitleýän Türkmen-britan söwda-senagat geňeşiniň hyzmatdaşlygyň has-da berkemegine uly goşant goşýandygyny, bu geňeşiň energetika, oba hojalygy, maliýe, bilim ýaly ugurlarda hyzmatdaşlygy ösdürmek üçin alyp barýan işleriniň aýratyn ähmiýetiniň bardygyny beýan etdi.

Türkmenistanyň özara bähbitli hyzmatdaşlyga açykdygy, onuň ýurduň ägirt uly tebigy we ykdysady mümkinçilikleri, Beýik Britaniýanyň tehnologik, innowasion ösüşiniň ýokary derejesi bilen baglanyşyklydygy nygtaldy. Bilim, medeniýet, ylym, syýahatçylyk we sport ýaly möhüm ugurlara aýratyn üns berildi.

Duşuşygyň ahyrynda söwda we ykdysady gatnaşyklaryň geljekde has-da giňeldiljekdigine ynam bildirildi.