24-nji aprelde Türkmen bedewiniň milli baýramy mynasybetli Aşgabatda geçirilýän dabaralaryň çäginde Türkmenistanyň we Tatarystan Respublikasynyň Prezidentleri Serdar Berdimuhamedow bilen Rustam Minnihanowyň arasynda gepleşikler geçirildi. Bu barada TDH habar berýär.

Gepleşikleriň çäginde ikitaraplaýyn taslamalaryň täze tapgyryny durmuşa geçirmek we uzakmöhletleýin hyzmatdaşlygyň geljekki ädimleri barada pikir alyşyldy.

Ýangyç-energetika toplumy, ulag-kommunikasiýa, söwda-ykdysady ulgamlar, oba hojalyk pudagy, ylma esaslanýan ýokary tehnologiýalar, işewürlik düzümleriniň ugry boýunça ikitaraplaýyn gatnaşyklary pugtalandyrmak ileri tutulýan wezipeleriň hatarynda kesgitlenildi. Şeýle hem maşyn gurluşygy, nebiti gaýtadan işleýän we gazhimiýa senagatynda ikitaraplaýyn gatnaşyklar üçin uly mümkinçilikler bar. 

Hormatly Prezidentimiz Halkara ahalteke atçylyk sport toplumynda bolmagynyň dowamynda Türkmen bedewiniň milli baýramy mynasybetli dabaralara gatnaşmak üçin ýurdumyza gelen daşary ýurtly işewürler bilen ikitaraplaýyn duşuşyklaryň birnäçesini geçirdi. Şolaryň hatarynda “Altkom” maliýe-senagat toparynyň, Ukrainanyň “Interbudmontaž” gurluşyk assosiasiýasynyň we “Ýugneftegaz” kompaniýasynyň ýolbaşçylary bar.