14-nji iýulda Daşkent şäherinde geçirilen türkmen-özbek gepleşikleriniň çäginde ikitaraplaýyn resminamalaryň uly toparyna gol çekildi.

Türkmenistanyň Prezidenti Serdar Berdimuhamedow we Özbegistan Respublikasynyň Prezidenti Şawkat Mirziýoýewiň gol çeken Bilelikdäki Beýannamasy iki döwletiň arasyndaky köpugurly gatnaşyklaryň täze ugurlaryny kesgitledi.

Resminamalaryň arasynda ylalaşyklar, ähtnamalar we beýleki resminamalar bar. Olara ministrlikleriň we beýleki edara ediş guramalaryň ýolbaşçylary gol çekdiler.

Umuman, dostlukly döwletleriň işewür toparlarynyň arasynda baglaşylan ylalaşyklaryň möçberi ABŞ-nyň 450 million dollaryndan gowrak boldy.

Daşkentde iki ýurduň telekeçilik düzümleriniň arasynda mebel toplumynyň, konditer, himiýa we oba hojalyk önümleriniň eksporty we importy barada birnäçe şertnamalara gol çekildi. Şeýle-de Türkmenistanda awtomobil önümçiligi boýunça kärhananyň taslamasyny düzmek hem-de Özbegistanda gurluşyk işlerini amala aşyrmak barada ylalaşyklar gazanyldy.