3-nji awgustda «Awaza» milli syýahatçylyk zolagynda hormatly Prezidentimiz Serdar Berdimuhamedowyň tabşyrygy boýunça iri halkara ýaryşlarda — Russiýa Federasiýasynda geçirilen «Ýüpek ýoly — 2022» ralli-reýdinde hem-de geçen aýda Özbegistan Respublikasynyň Daşkent şäherinde ýetginjekleriň we ýaşlaryň arasynda agyr atletika boýunça geçirilen Aziýa çempionatynda baýrakly orunlary eýelän türgenleri sylaglamak dabarasy boldy.

«Awaza» sport toplumynyň sportuň oýun görnüşleri binasynda geçirilen dabaraly çärä Hökümet agzalary, Milli Geňeşiň Halk Maslahatynyň, Mejlisiň, ministrlikleriň we pudaklaýyn dolandyryş edaralarynyň, jemgyýetçilik guramalarynyň, köpçülikleýin habar beriş serişdeleriniň wekilleri gatnaşdylar.

Abraýly halkara ýaryşlarynda Türkmenistana mynasyp wekilçilik eden türgenlere döwlet Baştutanymyzyň adyndan gymmat bahaly sowgatlar gowşuryldy.

Ajaýyp waka mynasybetli medeniýet we sungat ussatlarynyň konserti, şeýle hem sportyň dürli görnüşleri boýunça türgenleriň görkezme çykyşlary guraldy. 

Şeýle hem şol gün halkara ýaryşlara gatnaşyp, 2-nji we 3-nji baýrakly orunlara mynasyp bolan türgenlere Arkadagly Serdarymyzyň adyndan gymmat bahaly sowgatlary gowşurmak dabarasy boldy.