4-nji aprelde Baku şäherinde Türkmenistanyň wekiliýeti Günorta gaz geçelgesiniň Maslahat beriş geňeşiniň çägindäki 11-nji ministrler mejlisine gatnaşdy.

Çäräniň dowamynda çykyş etmek bilen Azerbaýjan Respublikasynyň Prezidenti Ilham Aliýew Azerbaýjanyň energiýa strategiýasy, halkara hyzmatdaşlygynyň ähmiýeti, Günorta gaz geçelgesiniň taslamasynyň sebit we halkara ähmiýeti barada jikme-jik gürrüň berdi.

Çykyş edenler Günorta gaz geçelgesiniň häzirki ählumumy geosyýasy şertlerinde Ýewropanyň energiýa howpsuzlygyny üpjün etmekde möhüm orun eýeleýändigini bellediler.

Mundan başga-da, «Trans Adriatik» turbageçirijisi arkaly gaz üpjünçiliginiň mukdaryny artdyrmak, şeýle hem Ýewropa käbir ýurtlaryna – Günorta-Gündogar we Merkezi Ýewropa döwletlerine gazy eksport etmegiň mümkinçiligi ýaly Günorta gaz geçelgesiniň infrastrukturasyny giňeltmek bilen bagly meseleler ara alnyp maslahatlaşyldy.

Duşuşykda Hazar deňzinde ýerleşdiriljek ýel elektrik stansiýalaryny goşmak bilen gaýtadan dikeldilýän energiýa taslamalary barada pikir alyşmalar geçirildi.

Çäräniň dowamynda ýaşyl energetika pudagynda hyzmatdaşlygy giňeltmäge gönükdirilen resminamalara hem gol çekildi.