18-nji aprelde geçirilen Ministrler Kabinetiniň mejlisinde wise-premýer N.Atagulyýew şu ýylyň 29-njy apreli – 1-nji maýy aralygynda Söwda-senagat edarasynda «Halkara söwda we hyzmatlar» atly sergi-ýarmarkasyny hem-de «Türkmenistanda halkara ülňülerine laýyk gelýän hil üpjünçiligi» atly halkara maslahatyny geçirmäge görülýän taýýarlyk işleri barada hasabat berdi.

Bellenilişi ýaly, bu sergä ýurdumyzyň söwda toplumyna degişli hem-de ugurdaş ministrlikleriniň we pudaklaýyn dolandyryş edaralarynyň, Senagatçylar we telekeçiler birleşmesiniň agzalarynyň, şeýle hem daşary ýurt kompaniýalarynyň we guramalarynyň gatnaşmagy meýilleşdirilýär.

Serginiň çäklerinde halkara hünärmenleriniň gatnaşmagynda eksporty ösdürmek, sanly marketing, sertifikasiýa talaplary ýaly meseleler boýunça maslahat beriş duşuşyklarynyň, işewürlik geňeşmeleriniň geçirilmegi göz öňünde tutulýar.

Halkara maslahatyna gatnaşmak üçin dünýäniň 27 ýurdundan kompaniýalaryň we guramalaryň 63-si hasaba alyndy we häzirki wagtda gatnaşmaga isleg bildirýänleri hasaba almak dowam edýär.

Şunuň bilen baglylykda, döwlet Baştutanymyzyň garamagyna degişli teklip hödürlenildi.