Türkmenistanly žurnalistler «Metbugat hyzmatdaşlygyny çuňlaşdyrmak – bilelikdäki ösüşiň hatyrasyna» şygary astynda açylan «Merkezi Aziýa – Hytaý» – 2025 media hyzmatdaşlyk forumyna gatnaşmak üçin Gazagystanyň paýtagty Astana şäherine bardylar.

Çäräni Hytaýyň «Žeňmin Žibao» gazetiniň guramagynda we Merkezi Aziýa ýurtlarynyň hem-de Hytaýyň öňdebaryjy habar beriş serişdeleriniň ýolbaşçylarynyň wekilleriniň gatnaşmagynda geçirilýär.

Forumyň gün tertibine dürli mowzuklary öz içine alýan tematik mejlisler girizildi. Olarda köpçülikleýin habar beriş serişdeleriniň medeniýetara gepleşiklerde köpri hökmünde orny we «Ýüpek ýolunyň ykdysady guşagynyň» çäklerindäki özara bähbitli hyzmatdaşlyga goşant goşmagyň mümkinçilikleri ara alnyp maslahatlaşylýar.

Forumyň üç gün dowam etjek maksatnamasynyň çäklerinde gatnaşyjylar üçin 29–31-nji maý aralygynda Gazagystanyň şäherlerine gezelenç guramak meýilleşdirilýär.