Geçen hepde Türkmenistanyň Döwlet haryt-çig mal biržasynda geçirilen söwdalaryň jemi eksport möçberi 1 million 367 müň ABŞ dollaryndan geçdi. Umuman, hepdäniň dowamynda daşary ýurt we ýerli telekeçileriň gatnaşmagynda 23 şertnama baglaşyldy.

Türkmen önümleriniň esasy alyjylary hökmünde BAE, Owganystan we Türkiýäniň işewür toparlary çykyş etdiler. BAE bilen Owganystanyň wekilleri “Türkmenhimiýa” döwlet konserniniň kärhanalarynda öndürilen suwuklandyrylan gazy satyn aldylar. Türkiýeli telekeçiler bolsa arassalanan pagta galyndylaryny aldylar.

Ýurdumyzyň içki bazarynda hem işjeňlik ýokary boldy. “Türkmennebit” döwlet konserniniň öndürýän ýol bitumy, polipropilen, binýatlyk ýag, şeýle hem portlandsement, pagta ýüplügi, mata we dokma galyndylary ýerli işewürleriň arasynda uly isleg bildirdi. Içerki söwdalaryň umumy bahasy 88 million 437 müň manatdan geçdi.