Warşawada (Polşa Respublikasy) Türkmenistanyň wekiliýeti Ýewropada Howpsuzlyk we Hyzmatdaşlyk Guramasynyň (ÝHHG-nyň) Demokratik institutlar we adam hukuklary boýunça býurosynda ýygnaklar we gepleşikler geçirdi.

Türkmenistanda Saýlawlary we sala salşyklary geçirmek boýunça Merkezi Toparynyň, Türkmenistanyň Mejlisiniň, Türkmenistanyň Daşary işler ministrliginiň we habar beriş serişdeleriniň wekillerinden ybarat bolan türkmen wekiliýetiniň Ýewropanyň bu paýtagt şäherine sapary Türkmenistanyň Prezidenti Serdar Berdimuhamedowyň görkezmesi esasynda amala aşyryldy.

Býuronyň müdiri Mariýa Tellalian, şeýle hem bölüm başlyklary bilen geçirilen duşuşyklarda we gepleşiklerde Türkmenistan bilen Ýewropada Howpsuzlyk we Hyzmatdaşlyk Guramasynyň (ÝHHG-nyň) Demokratik institutlar we adam hukuklary boýunça býurosynyň arasyndaky hyzmatdaşlygy has-da giňeltmek meselesi ara alnyp maslahatlaşyldy. Dürli ugurlarda hyzmatdaşlyk üçin “ýol kartasyny” düzmek barada ylalaşyk gazanyldy.