Türkmenistanyň Energetika ministrligi bilen Ýaponiýanyň “Sumitomo Corporation” kompaniýasy ýurtda elektrik üpjünçiliginiň ygtybarlylygyny we bökdençsizligini ýokarlandyrmaga gönükdirilen hyzmatdaşlyk hakynda Çarçuwaly ylalaşyga gol çekdiler.

Ylalaşygyň mazmuny howa elektrik geçiriji ulgamlarynda (EGU) buzuň emele gelmeginiň öňüni almak üçin ýöriteleşdirilen enjamlary ibermek taslamasyndan ybaratdyr. Geçirijileriň doňmagy üýtgäp durýan howa şertleri bolan sebitlerde energiýa ulgamlary üçin heläkçiliklere we öçüşlere getirýän meseledir.

Ýaponiýanyň öňdebaryjy kompaniýasy bilen bu hyzmatdaşlyk, Türkmenistanyň energetika pudagynyň maddy-tehniki binýadyny yzygiderli pugtalandyrmaga we içerki sarp edijileriň ygtybarly hem-de bökdençsiz elektrik üpjünçiligini kepillendirmek üçin öňdebaryjy tehnologiýalary ornaşdyrmaga berýän ähmiýetini görkezýär.