Berkarar Watanymyzyň hemişelik Bitaraplygynyň 30 ýyllyk baýramçylygy we Halkara Bitaraplyk güni mynasybetli paýtagtymyzda, Türkmenistanyň Söwda-senagat edarasynda giň gerimli sergi açyldy. Oňa ajaýyp sene mynasybetli dürli dabaralara gatnaşmak üçin Türkmenistana gelen köp sanly daşary ýurtly myhmanlar hem-de halkara guramalaryň wekilleri hem baryp gördüler.

Sergini synlamak maksatly dabaranyň başynda onuň resmi açylyşy hökmünde Türkmenistanyň hemişelik Bitaraplygynyň şanly 30 ýyllygyna bagyşlanan sergä gatnaşyjylara hormatly Prezidentimiz Serdar Berdimuhamedowyň iberen Gutlagy okaldy.

Döwlet Baştutanymyz serginiň öz işine başlamagy bilen gutlap, bu giň möçberli serginiň uly üstünliklere beslenmegini tüýs ýürekden arzuw edip, onuň ata Watanymyzyň hemişelik Bitaraplygynyň 30 ýylynyň dowamynda ähli pudaklarda gazanan üstünliklerini beýan etmek bilen, garaşsyz ösüşiň ýolunda ykdysadyýetde, syýasatda, durmuş ulgamynda, medeni-ynsanperwer, ylym we tehnologik ugurlarda ýeten belent sepgitleriniň aýdyň subutnamasyna öwrüljekdigine berk ynam bildirdi.