Türkmenistanyň DIM-inde 2026-njy ýylyň 4-nji martynda Türkmenistanyň daşary işler ministriniň orunbasary Ahmet Gurbanowyň Koreýa Respublikasynyň daşary işler ministriniň köpçülikleýin diplomatiýa boýunça orunbasary Lim Sang-Wu bilen duşuşygy geçirildi.

Duşuşygyň dowamynda diplomatlar syýasy, söwda-ykdysady we medeni-ynsanperwer ulgamlarda türkmen-koreý gatnaşyklarynyň ösüşiniň ýokary derejesini bellediler. Söhbetdeşler ýokary we iň ýokary derejelerde meýilleşdirilýän saparlara we çärelere taýýarlyk meselelerine aýratyn üns berdiler.

Taraplar halkara we sebit gün tertibiniň möhüm meseleleri boýunça pikir alyşdylar. Hususan-da, Ýakyn Gündogardaky ýagdaýa deglip geçildi we sebitde parahatçylygy, howpsuzlygy hem-de durnuklylygy üpjün etmek maksady bilen tagallalary birleşdirmegiň ähmiýeti nygtaldy.

Lim Sang-Wu pursatdan peýdalanyp, Eýrandan gelýän Koreýa Respublikasynyň raýatlary üçin üstaşyr geçişi üpjün etmekde beren ýardamy üçin türkmen tarapyna hoşallyk bildirdi.

Duşuşygyň ahyrynda taraplar iki ýurduň arasyndaky köptaraplaýyn gepleşikleri mundan beýläk-de giňeltmäge taýýardyklaryny tassykladylar.