2026-njy ýylyň 4-nji martynda Bakudaky “Bina” atçylyk-sport merkezinde Türkmenistanyň meşhur “Galkynyş” milli atçylyk toparynyň gatnaşmagynda täsirli medeni çäre geçirildi.

Bu meşhur toparyň çykyşy türkmen atçylygynyň baý däplerini we çapyksuwarlaryň özboluşly ussatlygyny görkezmek bilen, dostlugyň we sungatyň hakyky baýramyna öwrüldi.

Topar öz maksatnamasyny ilkinji gezek azerbaýjan tomaşaçylaryna hödürledi. Artistler at üstündäki oýunlaryň çylşyrymly hereketlerini, täsirli akrobatik tilsimlerini we ajaýyp sazlaşygy görkezdiler, bu bolsa türkmen atçylyk sungaty mekdebiniň ýokary hünär ussatlygynyň we köpýyllyk däpleriniň ýüze çykmasy boldy. Tomaşaçylar dowamly el çarpyşmalar bilen şowhunly we gyzykly çykyşy mähirli garşyladylar.

Mundan başga-da, Türkmenistanyň Döwlet sirkiniň we Arkadag şäherindäki Döwlet atçylyk sirkiniň ussatlary çykyş edip, ýurduň milli medeniýetini we häzirki zaman sirk sungatynyň üstünliklerini görkezýän täsirli akrobatik we çeperçilik çykyşlary hödürlediler.

Agşamyň iň şowhunly böleginde Türkmenistanyň we Azerbaýjanyň döwlet baýdaklary bilen atçylaryň eden çykyşlary iki döwletiň arasyndaky doganlyk gatnaşyklaryň we medeni-ynsanperwer hyzmatdaşlygyň güýçlenýändigini alamatlandyrdy. Bu çäre ikitaraplaýyn gatnaşyklaryň ösüşine we Türkmenistanyň medeni mirasynyň daşary ýurtlarda giňden ýaýradylmagyna uly goşant goşdy.

Şeýle hem saparyň dowamynda «Türkmen atlary» döwlet birleşigi bilen Azerbaýjan Respublikasynyň Atçylyk Federasiýasynyň arasynda atçylyk sporty we atçylyk ulgamynda hyzmatdaşlyk etmek boýunça özara düşünişmek hakynda Ähtnama gol çekildi.