BMG-niň Aşgabatdaky binasynda Bütindünýä inçekesele garşy göreş gününe bagyşlanan ylmy-amaly maslahat geçirildi. Şu ýyl bu çäre «Hawa! Biz inçekeseli ýok edip bileris!» diýen şygar astynda geçdi. Duşuşygy Bütindünýä Saglygy Goraýyş Guramasynyň (BSGG) Türkmenistandaky Ýurt boýunça edarasy gurady. Forumyň esasy maksady gazanylan ösüşleri seljermek we 2030-njy ýyla çenli epidemiýanyň köküni kesmek baradaky ählumumy maksatlara ýetmek üçin halkara hyzmatdaşlygy berkitmekden ybarat boldy.

Köpugurly görnüşde geçen maslahata gatnaşyjylar Türkmenistanyň 2026 – 2030-njy ýyllar üçin täze Milli strategiýasyna geçmegini ara alyp maslahatlaşdylar. Hünärmenler «Inçekeselsiz Merkezi Aziýa» atly sebit başlangyjyny durmuşa geçirmäge we dermanlara durnukly inçekesele garşy göreş çärelerine aýratyn üns berdiler. Şeýle hem AIW-niň (ВИЧ) we wirusly gepatitleriň öňüni almak, şol sanda ýokançlaryň eneden çaga geçmeginiň öňüni almak boýunça halkara başlangyçlar baradaky meselelere deglip geçildi.

Maslahatyň ikinji bölegi lukmançylykdaky innowasion çemeleşmelere bagyşlandy. Hünärmenler irki anyklaýşyň döwrebap usullaryny, täze sanjymlary ornaşdyrmagyň geljegini we utgaşykly ýokançlary bejermek boýunça geçirilen dessin barlaglaryň netijelerini öwrendiler.

Maslahatyň ahyrynda gatnaşyjylar bilelikdäki işiň ileri tutulýan ugurlaryny kesgitläp, diňe tagallalaryň birleşdirilmeginiň sebitde bu howply keseli doly ýeňmäge mümkinçilik berjekdigini nygtadylar.