18-nji sentýabrda Türkmenistanyň Daşary işler Halkara gatnaşyklary institutynda Türkmenistanyň Prezidenti Serdar Berdimuhamedowa Koreýa Respublikasynyň Songýungwan uniwersitetiniň syýasy ylymlaryň hormatly doktory derejesiniň berilmegine bagyşlanan dabaraly maslahat geçirildi.

Çärä Türkmenistanyň Daşary işler ministrliginiň, Bilim ministrliginiň, Türkmenistanyň Ylymlar akademiýasynyň ýolbaşçylary we wekilleri, ýurdumyzyň ýokary okuw mekdepleriniň rektorlary we mugallymlary, ylym işgärleri, diplomatlar, köpçülikleýin habar beriş serişdeleriniň wekilleri hem-de talyplar gatnaşdylar.

Maslahatda Türkmenistanyň Ministrler Kabinetiniň Başlygynyň orunbasary, Türkmenistanyň Daşary işler ministri Raşid Meredow çykyş etdi.

Türkmenistanyň Daşary syýasat edarasynyň ýolbaşçysy Koreýa Respublikasynyň Songýungwan uniwersitetiniň «Syýasy ylymlaryň hormatly doktory» diýen derejesiniň berilmeginiň Türkmenistanyň Prezidenti Serdar Berdimuhamedowyň görnükli hyzmatlarynyň, ýurduň ösüşine, onuň syýasy ulgamynyň, ykdysadyýetiniň we durmuş ulgamynyň kämilleşmegine, şeýle hem Türkmenistanyň halkara giňişligindäki ornunyň we abraýynyň ýokarlanmagyna goşan uly şahsy goşandynyň ykrar edilýändiginiň aýdyň subutnamasydygyny nygtady.

Maslahatyň dowamynda çykyş edenler Arkadagly Gahryman Serdarymyzyň halkara hyzmatdaşlygyny işjeňleşdirmäge, özara düşünişmegi çuňlaşdyrmaga we dünýä ýurtlary bilen medeni-ynsanperwer gatnaşyklary giňeltmäge goşýan saldamly goşandyny biragyzdan nygtadylar.

Şeýle hem bu wakanyň Türkmenistan bilen Koreýa Respublikasynyň ylym, bilim, sanlylaşdyrma we ýokary hünärli işgärleri taýýarlamak ýaly möhüm ugurlardaky hyzmatdaşlygyny mundan beýläk-de çuňlaşdyrmak nukdaýnazaryndan ähmiýeti bellenildi.

Dabaraly maslahatyň çäklerinde Türkmenistanyň ylym-bilim ulgamyndaky gazananlaryny we halkara gatnaşyklarynyň ösüşini beýan edýän tematiki sergi hem geçirildi.

Çäräniň ahyrynda oňa gatnaşyjylar Türkmenistanyň Prezidenti Serdar Berdimuhamedowa Ýüzlenme kabul edip, ýurdumyzyň halkara abraýyny pugtalandyrmak, ylym we bilim ulgamlaryny ösdürmek hem-de daşary ýurtly hyzmatdaşlar bilen netijeli gatnaşyklary giňeltmek boýunça alnyp barylýan işler üçin hoşallyklaryny beýan etdiler.