Berkarar döwletiň täze eýýamynyň Galkynyşy döwründe döwletimizde ähli ulgamlar bedew batly ösüşlere eýe bolýar. Ýurdumyz hormatly Prezidentimiziň alyp barýan döwlet syýasaty, aýdyň başlangyçlary esasynda rowaçly ýollarda diňe öňe barýar. Ähli ugurlar bilen bir hatarda Türkmenistanyň Zähmet we ilaty durmuş taýdan goramak ministrliginiň işi hem has kämilleşýär, döwrebaplaşýar. Ministrlikde hemişelik Bitaraplygymyzyň şanly 29 ýyllygy mynasybetli köpsanly dabaraly wakalar bolup geçýär. Hemişelik Bitaraplygymyzyň şanly 29 ýyllygy Balkan welaýatynda hem toý dabaralaryna beslenip bellenilýär. Düýn Gyzylarbat şäheriniň ajaýyp künjeginde Türkmenistanyň Zähmet we ilaty durmuş taýdan goramak ministrliginiň Balkan welaýatynyň Pensiýa gaznasynyň müdirliginiň Gyzylarbat etrap pensiýa gaznasynyň bölüminiň häzirki zaman hil ülňülerine laýyk gurlan, täze üç gatly edara binasynyň ulanyşa girizilmegi hem bu dabaralaryň üstüni ýetirdi.

Garaşsyz hem hemişelik Bitarap Diýarymyzda üstünlikli amala aşyrylýan  durmuş maksatly taslamalaryň  çäklerinde bina edilip, ähli babatlarda döwrüň ösen talaplaryna doly laýyk gelýän täze binanyň açylyş dabarasy Balkan welaýatynda iň iri etrap merkezleriniň biri bolan Gyzylarbat şäherinde juda uludan tutuldy. Oňa Balkan welaýat Gyzylarbat etrap häkimlikleriniň jogapkär işgärleri,  döwletimiziň Zähmet we ilaty durmuş taýdan goramak ministrliginiň ýolbaşçylary, Türkmenistanyň Mejlisiniň deputatlary, jemgyýetçilik guramalarynyň we ýaşuly nesliň wekilleri, şäheriň köp sanly ýaşaýjylary ýokary ruhubelentlik bilen gatnaşdylar.

Hormatly Prezidentimiziň parasatly baştutanlygynda raýatlaryň durmuş taýdan goraglylygyna, olaryň ýaşaýyş derejesiniň yzygiderli ýokarlandyrylmagyna aýratyn üns berilýär. Bu ugurda alnyp barylýan işlerde, iň täze usullara, oňyn tejribelere daýanylýar. Balkan welaýatynyň Gyzylarbat etrabyndaky täze bina hem Türkmenistanyň alyp barýan syýasaty adamy jemgyýetiň we döwletiň iň ýokary gymmatlygy diýip yglan edýän Türkmenistanyň Konstitusiýasynyň esasy düzgünlerine berk eýermek esasynda dowam etdirilýändiginiň subutnamasy boldy. Gyzylarbat etrabynda açylan bu täze bina zähmet ugry boýunça, ilatyň durmyş taýdan goraglylygyny üpjün etmekde täze ugur bolup hyzmat eder.

Açylyş dabarasynyň dowamynda çykyş edenler Balkan welaýatynyň halkyny bu möhüm waka bilen gutladylar we hormatly Prezidentimize, Gahryman Arkadagymyza hoşallyklaryny beýan etdiler. Bu ýerde sungat ussatlarynyň ýerine ýetirmekliginde ýaňlanan döwrebap aýdym-sazlar, şowhunly tanslar bu ýere ýygnanan märekä ruhy lezzet paýlady. Balkan welaýatynyň Pensiýa gaznasynyň müdirliginiň Gyzylarbat etrap pensiýa gaznasynyň bölüminiň binasynyň gurluşgynda Türkmenistanyň Senagatçylar we telekeçiler birleşmesiniň agzasy bolan «Gözel zaman» hususy kärhanasynyň gurluşykçylary ýokary derejeli binagärlik ussatlygyny görkezipdirler. Ýokary derejedäki dabarada myhmanlar il sylagly ýaşulularyň ak pata bermegi bilen açylan täze bina aýlanyp gördüler. Bina döwrebap kompýuter enjamlarydyr degişli tehnologiýalar bilen birkemsiz üpjün edilipdir. Bu bolsa hyzmatyň hil derejesini düýpli ýokarlandyrmaga giň mümkinçilik berer. Iş otaglaryndaky mebelleriň öz ýurdumyzda öndürilmegi bolsa aýratyn bellenilmäge mynasypdyr. Elektrik üpjünçiliginiň, ýyladyş-sowadyş ulgamlarynyň özbaşdak bolmagy hünärmenlerimiziň öz işlerini bökdençsiz we netijeli alyp barmaklaryna oňyn täsirini ýetirer.

Dabaranyň dowamynda bu ajaýyp binanyň gurluşygynda göreldeli zähmet çekenlere sowgatlar gowşuryldy. Balkan welaýatynyň Pensiýa gaznasynyň müdirliginiň Gyzylarbat etrap pensiýa gaznasynyň bölüminiň täze binasy hormatly Prezidentimiziň taýsyz tagallalarynyň durmuşa geçýändiginiň aýdyň subutnamasy boldy. Goý, halkyň asuda durmuşyny üpjün etmekde, zähmet üstünliklerine ýetmekde giň şertler döredip berýän hormatly Prezidentimiziň, Gahryman Arkadagymyzyň janlary sag, belent başlary aman, işleri rowaç bolsun.